About COSMOGLOTTA Biblioteca
Preservation del Publicationes Occidental.
Feed Subscriptions
Naturalatri o natural?
On ha nominat Occidental-Interlingue un lingue naturalatri.
To es certmen un erra. Occ-Ile ne es naturalatri ma simplicmen natural e crescet.
On va rider! Nu bon! esque un fox-terrier, un bulldog, barsóy, mops, basset, etc., es canes natural o constructet? Sin li cuidas e li arte elevatori, generatori e copulativ del hom, solmen per se self, ili nequande vell exister. E malgré to ili es vivent e ne machines, robotes e canuncules (on ne posse dir homuncul!)
Yer on fat grand experimentes in Germania por retroviventar li extintet rasses del Wisent e del sabagi cavall, antey hant populat Europa. On fat to per Mendel-ism, per apt copulationes, elimination de ne-desirat qualitas, elevation e infortiation de special caracteres distintiv, etc.
Just li sam fat li autor de Occidental-Interlingue. Del ancor vivent latin il obtenet un genitori materiale quel il copulat con existent formes in li vivent lingues, eliminante pluri antiquat qualitás, etc. In li tot lingue Occ-Ile ne es ni un sol purmen inventet o mem falsmen aplicat natural element, quam to es tre sovent trovat in li altri mem max progresset e perfect lingues constructet.
Qualmen? on me va dir, ma por exemple scrir, leer, extinter, etc., quel omnes ne existe ni in un sol lingue vivent. Certmen, ma ili ne es inventet, sam quam un fox-terrier ne es inventet. Ili ha nascet per sagi copulation de divers “rasses” de ti paroles in li existent lingues. P.ex.:
scrir, – scrit, — scrit-ura. It es li resultate del copulation del F. écrire (antiqui escrire), — écrit, écriture e li italian scrivere — scritto, scrittura. Per li copulation noi ha recivet un totalmen regulari verb con regulari derivationes, quel in latin contenet mult irregulari formes, solmen partli eliminat in li modern romanic lingues.
Aha! un sorte de chimere, quam un leon con cap de tauro e pattes de avio! Nu, chascun save, que tal animales on ne posse reciver per copulation, ili resta chimeres nerealisabil in vive. In li linguistica li experiment ha esset fat in grand extension per Sr. J. Weisbart in su Medial, p. ex. D Locke e F boucle da in Medial lokl; F éviter + D. vermeiden = emidir. A joy + D Freude = joid. Ma il self ja desde long ha evidet li falsitá de su experimentes.
Ma ti experimentes devet esser fat un vez por convicter li skepticos. Noi save que in quelc casus on posse copular animales de divers species, almen de sam genere, si ili ne es tro desproxim, p. ex. cavall e asin, ma li mul es steril.
In li lingues tal combinationes es in cert casus usat, ma specialmen in technica, p. ex. tele-vision, combination de antiqui mort grec con latin ancor vivent, sammen auto-mobil. Ma malgré li grand inundation de technic paroles in li natural vivent lingues, li lingue self resta alquicos vivent in quel reye ne li leyes del technica ma leyes psychologic. Sin egardar ti natural leyes on ne va posser introducter un vermen usabil lingue international. E. de Wahl
