POR QUO ON FA EXEMPLES?

Explication de Ilmari Federn pri Occidental-Interlingue.

Quelc témpor pos mi transition de Ido a Occidental un amico idistic visitat me. In comensa de nor incontra noi evitat li delicat question, quel naturalmen brulat sur nor lingues, ma ti tacentie ne esset mantenibil, e bentost noi esset in plen discussion. In secuent, un episode ex it:

Il: Quande to ancor esset Idist, anc tu criticat li inprecision del unic “de” Esperanto e defendet in tri precis Ido-paroles da, de, di quam superior. Nu anc Occidental have solmen un: de.

It vell interessar me audir, qualmen tu hodíe defende, quo tu unquande ha criticat.

Yo: Li practica self de Ido ha convictet me, que li tri parolettes es tre desfacil a usar. Apen un Idist posse usar les corectmen, li plupart sempre confunde les. Yo sovente besonat mult reflection por aplicar li corect parol, e tamen dúbites restat. Pri li de de Occidental nequande eveni dúbit. Adplu li triplicitá es superflú ballast: ples monstrar me un unic exemple in Cosmoglotta, u li “de” crea ambiguitá.

Il: Quo tu responde a ti exemple: Li Espo-frase: “La štelitaj štrumpoj de la knaboj de la fiškaptisto” have quar signigicationes diferent, queles noi distinte in Ido per posir li pares da-di, da-de, de-da, de-di in li frase “La kalzi esas furtita… la pueruli… la peskisto.” Ci, Occ es tam ínprecis quam Espo; quo tu responde?

Yo: Noi posse tre bon expresser li divers sense, sive per usar altri constructiones, sive per substituer per o fro a de, u vu usa da e de. E nor per e fro ne demanda li sam rigorosi reflection quam vor paroles. Ma in general on posse scrir de e it va suficer, nam tal constructet exemples pruva necos. Solmen exemples prendet ex realitá, ex li practica, es convictiv. Tal special exemples por atrappar alquem on sempre posse far, mem por li max bon sistema.

Il: Ma por to on ya, fa exemples, por monstrar li defectes del altri sistema in form plu condensat.

======

A ti logica yo plu ne savet responder. Ma yo aprendet ti valorosi eclaration psykologic: On “fa” exemples por demonstrar “in condensat maniere” un defect quel in li practic usation del criticat sistema totalmen ne es remarcat. I.F.

Remarca del redaction: Ti manie composir rarissim exemples por pruvar li necessitá de distintiones complicat es debit a L. de Beaufront, de quel li ínfelici influentie ha esset desastrosi por Ido. Per exceptional exemples on posse pruvar mult coses absurd: it sufice composir les! Un vez Beaufront self publicat un grand titul: la linguo supleanta Ido, e il ne videt que it significat du coses exactmen contrari: li pleent lingue quel nomina se Ido, e li lingue quel suplee Ido. Ti exemple pruva in fund que li obligatori acusative, quel esset faruchmen combattet de Beaufront, es indispensabil por evitar ambiguitás!

Si li Idistes es logic, ili deve strax readopter ti acusative! In realitá, on deve admisser que un exemple mem composit, ne es suficent por far introducter un precision quel es inutil e molestant in li 99% del altri casus e ti rasonament es anc bon por li preposition de in Occ-Ile.