About COSMOGLOTTA Biblioteca
Preservation del Publicationes Occidental.
Feed Subscriptions
Li problema del LINGUE INTERNATIONAL…
… ha occupat li pensas de mult persones. Li unesim projecte, quel ha havet alcun success, es Volapük del cononico J. M. Schleyer (1881).
Un grand progress representa ja li “Lingvo internacia” de Dr. L. Zamenhof, pos nominat “Esperanto” (1887) quel pro su facilitá e grandissim propaganda ha atinget suficent atention in li munde. Ma li defectiv e innatural formes ha evocat li critica de divers competent persones. Li esperantistes ha refusat omni reformas in lor “Kar lingvo” e pro to ha aparit mult nov projectes, quam Neutral, Universal, Ido, Esperantida, Romanal, Interlingua, Medial etc (totalmen plu quam 200 projectes), de queles Ido, un secession de Esperanto hat atinget relativmen grand propagation. Ma li majorité del Idistes adheret a Occidental. Nu, hodíe Ido have nov interesse. Ma li ignoration del psycologic leyes del lingues, li ultra-logistica del Ido parolformation ha ductet a mutilation del majorité international paroles.
Li vermen practic LINGUE INTERNATIONAL deve esser comprensibil a omni person de occidental civilisation e facil por omni altri person aprender it. Adplu it deve esser comprensibil sin studia anterior por li max mult individuales. Solmen un lingue ja hodíe usabil in omni circumstanties in comercial anuncias e reclames, in changes de collectionistes del tot munde, in frafic e scientie posse contentar li postulationes del comunicationes international. Un tal lingue es…
OCCIDENTAL-INTERLINGUE
li max moderni forme del Lingue International. Li analytic gramatica, basat sur 30 annual scientic explorationes es li max simplic e facil possibil, e per su construction representa li summation e coronation del anterior experienties. Li regulari scientic derivation de omni international paroles compensa li aprension del desfacil Latin.
Occidental-Interlingue es li moderni “koiné” lingue international. It es li democratic Latin. It es li nov “anglési” del futur!
Por un person qui ha aprendet Occidental-Interlingue omni international sciential paroles in su construction natural es clar quam cristall.
Li mil-annual cultura es nu por omni.
Ples provar usar Occidental-Interlingue in relationes international e vu va vider li efecte, apart in li grand cités con polyglottic population.
Ples adherer al AULI discussion list por aprender li ver Lingue International.
