LI SPLITTRE E LI TRAVE, #2

Schematisme e naturalitá in lingues international, (continuat)

Li veritá es que on ne posse oposir “Schematisme” (tal qual Sr. Schild sembla concepter it) a “naturalitá“. Nam schematisme lude un rol important mem in li lingues vivent.

In quó consiste li labor del grammaticos, si ne in classificar li elementes lingual in categories de queles chascun forma li modelle por un determinat númere de paroles? Ili comensa por ex. per far li distintion inter verbes regulari e irregulari. Poy ili subdivide li verbes regulari in special classes. Chascun parol inrangeat in li sam classe seque li sam regules de formation. It sufice monstrar li formes conjugativ de un sol verbe por haver li clave por li formation de omni altres del sam classe.

Quo to es, si ne “schematisme”? Li infante quel aprende parlar, seque instinctivmen li sam lege. It es conosset, de altri látere, que omni verbes novimen format es conjugat, sin exception, secun li modelle del verbes regulari. Li schematisme es plu fort quam li tradition e it vell esser proprimen absurd condamnar it quam “innatural”.

Sr. Schild erra, si il crede que li autores de lingues constructet ha fallit in lor prova, crear lingues “natural” unicmen pro que ili “ne successat desembarassar se del schematisme“. In contrari, ili ha recurret al schematisme in plen conscientie del facte que it es li sol medie quel li leyes del lingue oferta les por realisar li postulate del facilitá quel es, e malgré omnicos resta, un del pilares fundamental in li construction de un lingue auxiliari. Támen, si li schematisme, per su natura self, es un procede de construction perfectmen natural, su aplication irreflectet posse, quam monstra li exemple de Espo, provocar conflictes con li postulate del naturalitá. It vell esser absurd pretender que De Wahl successat eliminar sin exception omni casus de friction existent. Il esset un genie, ma ne un magico. Ma il successat trovar li max bon solution possibil in su eforties, conciliar li postulate regularitá (quel es ci sinónim a schematisme) con ti de naturalitá. It es ni just, ni logic, mesurar li valore del resultate atinget per li litt númere de casus irreductibil, i.e. tis queles resistet a su metode de derivation, e silentiar modestmen pri li aplastant majorité (adminim 90%) del casus queles il successat soluer in maniere til nu ínegalat. Por convicter now pri to, it sufice tornar nor atention al resultates queles IALA obtenet per su metodes, pretendetmen plu scientic e sol natural.

Esser continuat in #3.