INTERLINGUE E INTERLINGUA, #3

Eufonie.

It es cert que li vocales final rendi li lingue plu sonori, ma sonoritá ne es sinonim de eufonie. It sufice, por convicter se pri to, audir italian in li bocca de angleses e franceses. Li angleses have un natural tendentie negliger (”manjar“) li finales vocalic, talmen que li diferenties inter -e, -o e -a es sovente imperceptibil.

Li franceses, in contrari, tende a superaccentuar li finales, pro que ili es, in lor grand majorité, insensibil al importantie del accentu tonic quel ne existe in lor lingue matrin. Lu remarcabil es que, omnicos considerat, li pronunciation defectiv del angleses es ancor plu suportabil quam ti del franceses. In tre mult casus, italian parlat de un francese es presc un tortura por li auditor. Li experienties fat con franceses parlant Espo e Ido plenmen confirma ti tese.

It certmen ne es un hasarde que Occidental, malgré su relativ povritá in finales -o e -a, es plu eufoniosi in li bocca del sudromanes (queles have un secur instincte por ritme e corect accentuation) quam es ILa, malgré su superabundantie de vocales -o e -a, in li bocca de franceses, anglosaxones e germanes. Nequó monstra plu bon li total misconossentie del leges fonetic queles conditiona li bellsonantie del lingues, quam li naiv crede in li magic efecte del procede purmen mecanic quel consiste in multiplicar li finales -o, -a e -e in substantives e -e in adjectives.

Esser continuat in #4, Li arcaismes de ILa.