LINGUE #2

Adjectivic finale -i

Li sequent articul de Edgar von Wahl ex Cosmoglotta april 1929 certmen va interessar mult letores.
Red.

Quelc persones critica li adjectivic finale i, nómina it un esperantisme e postula su elimination.

Ja mag. A. Z. Ramstedt in su articul “Finale del adjectives” (Cosmoglotta, nró. 48, pg. 76) ha monstrat que, si on vole introducter un adjectivic finale-sufix, it posse esser solmen -i, quam li maxim international.

In Occidental on mem posse regardar it quam quasi acurtat sufix -ic. It es anc clar que in li sufixes -ari, -ori it es absolut necessi

1) por distintion del sufixes -ar e -or, ma
2) anc pro li ulteriori derivation a -ario, -orio etc.

Egalmen to es in levi, brevi etc. ex queles on deriva aleviar, abreviar etc. E contra li usation del finale -i quam caracteristic sufix in tal casus probabilmen anc li adversarios ne va posser objecter. De facto lor critica e antipatie es tornat contra ti casus u ti -i ne have sufixl valore, i.e. u on adjunte it a ja pur adjectivic radicas, p. ex. “boni“, “clari“, “grandi” etc. Specialmen chocat es li personaes parlant italian, u ti -i significa li plurale.

Advere on ne posse egardar li pretensiones de un sol popul, proque on sempre va trovar un lingue in quel alcun parol o sufix va significar alquicos tot altri e mem contrari, p. ex. in Esperanto e in sved li paroles ni e vi es just oposit; zapomnil in russ es “ha memorat” e in polonesi “ha obliviat” etc. Dunc ti circumstantie sol ne posse esser cause por elimination de -i.

Ma it es ver que in ti paroles li -i, proque ne trovabil necú, sona e aspecte tre foren, e pro to choca divers persones. Ma just ci it ya totalmen ne es necessi.

Li regules de Occidental tre clarmen di que li usation del finale -i del adjectiv es absolutmen voluntari e nullmen obligativ, u it ne es postulat per li form del sufix o li necessitá distinter it de un identic substantive, si posse eventer un miscomprension. E pro to it totmen ne es necessi usar ci ti finale.

On posse tre bon usar ti paroles sin finale o on vell posser mem adjunter li general eufonic finale e: bone, clare etc. Ma quam ja dit, lu maxim bon es dir bon, clar etc.

On posse mem consiliar ne abusar in tal casus li finale -i, quel es foren a nor lingues. Til nu divers persones ha usat it tro sovente. E it nequande es desirabil chocar li publica, e specialmen si to es absolut evitabil secun li regules grammatical de Occidental.

EW