Confession

UN PRECIOSI CONFESSION…

In un articul intitulat “La supersignoj“, Sr. T. Jung, redactor de HEROLDO DE ESPERANTO occupa se in su torne pri li problema de un eventual reforme ortografic de Esperanto, iniciat per li campanie de John Kubacky (vice Cosmoglotta A 135).

Li autor ariva al conclusion que li circumflexat lítteres, benque ne constituente un obstacul cardinal al victorie de Esperanto, támen es sentit quam extremmen genant in li practic aplication del lingue.

Noi ne vole ci discusser li concret projectes de reforme ortografic exposit in li citat articul, nam noi save in antey que, mem si ili vell esser centvez plu bon quam ili es, lor autores vell esser íncapabil victer li obstinat conservacitá del ductores esperantistic e lor ciec odie de omnicos quo de proxim o de lontan have un odore de “reforme”. To quo interessa nos es li exposition del concret factes per queles Sr. T. J. ilustra li desagreabilitás provocat per li presentie de ti maledit lítteres circumflexat in li alfabete de Esperanto.

Vu save que chascun vez quande noi permisse nos aluder li desfacilitás causat per li lítteres tegmentat in Esperanto, it trova se un fanatico ex li campe Zamenhofan quel picte nos quam mentiardes e afirma que omni grand printerías possede li special lítteres circumflexat e que ergo Esperanto-textus posse esser printat partú sin alquel desfacilitá.

Or vi quo li redactor de HEROLDO di pri ti punctu (noi traducte fidelmen ex Esperanto):

Solmen poc printerías sur li tot globe terral possede lítteres con Esperanto-supersignes e probabilmen ne mem un sol scri-machine in li tot munde have li Esperanto-lítteres. E ti tre poc printerías queles possede Esperanto-supersignes, have tis-ci solmen in du-tri grandores de un o du caracteres, i.e. in du-tri o admaxim 6 ex cent o centes de species. Quande HEROLDO esset printat in su propri printería, noi procurat no li lítteres circumflexat in pluri grandores e caracteres, por posser printar anc títules e comercial publicationes con ti tipes. To custat nos un bell summa de moné e malgré to it restat ancor tre mult grandores e caracteres in queles mancat li lítteres circumflexat.

Li printería quel nu printa HEROLDO possede li supersignes in du grandores de du caracteres e in un grandore de du altri caracteres. To fa in tot 6 diversi species. Ma it ne possede les in alquel grandore superior a 12 punctus *). In consequentie it ne es possibil printar normalmen titules con grand lítteres queles contene supersignes. Pro to noi devet changear mult títules quo ne es sempre facil, sovente mem impossibil. Un de nor letores questionat nos un vez pro quo noi in nor numeró del 1.8.1947 scrit “Uneco nia unua aksiomo” vice “Unueco nia c^efa aksiomo”. Noi nu posse revelar le que to evenit unicmen pro ti litt supersigne (sur li c en c^efa) quel li printería ne posset printar.

Yo pensa que ti extremmen interessant confession dispensa nos de omni comentarie ulterior.

A.M.
1948