Li Viennes Ido-Societo - 1924

Li Viennes Ido-Societo abandona Ido! . . . .

Ye 14 novembre 1924 ha evenit in Vienna un convent general de Ido-Societo Progreso por votar pri mutation del direction e Statute.

Li membres L. Eckel, A. Fuchs, K. Janotta, R. Kozeschnik, E. Moess, E. K. Pigal e A. Valenti fa li secuent proposition:

§ 1 del Statute del societé deve esser mutat a:
“Li Societé have li nómine ‘Societé Cosmoglott Progress’ (in vice de Ido-Societo Progreso) e excludente omni tendenties religional e politic it have quam scop li scientic e practic cultimvation e propaganda del Lingue International Auxiliari, quam it es conform al statu del scientic exploration max recent (in vice de ‘Ido’).”

Li membres ortodox a Ido in ultim tempore nequande fe prender [prendet] parte in li conventes del club; e li membres activ presc omni es occidentalistes. Ma audiente que li question es li existentie de Ido, li inamicos de Occ. hasta al Societo por prescrir a it su programma. Tamen che li votation mem ne apare un absolut majorité por refusar li mutation.

Conform al nov interesses del Societé on decide que de nu on tracta idistic questiones solmen omni duesim semane, e in li altri conventes on dura li discurses linguistic e propagatori pri Occidental.

On electe li Comité quam secue:
Presidente general: K. Janotta; pres por Occ: E. K. Pigal, por Ido: J. Baller; secretario: E. Moess; vice-secretario: L. Eckel; cassera: L. Menzel; bibliotecario: H. Quint; revisores: Gumpenberger e Zawrel.

Brevi historie del Societé:

Ido-Societo Progreso Wien existe de annu 1909. In li duesim annu de su existentie it edite “Lakonika Guidilo tra Wien ed en su cirkaji” redactet in Ido de su unesim presidente Gunert (ex-volapükaist).Til comensa del guerre in annu 1914 li societé developa diligent actiones. Su membres conveni omnisemanli e on arangea sovente discurses public, anc con images projectet.

Durante li guerre quande su presidente K. Janotta e altri fervent membres ha devet far servicie militari li vive del societé presc totalmen cessa. Ma in 1919 it recomensa; nov colaboratores intra e fa agitation public por Ido. It deveni un del max vigilant del societés idistic. Ma li Viennes Ido-Societo apu li practic labores por li L. I. sempre ocupa se anc pri li scientic problema de it.

Pos 6-anual stagnation del labores del Ido-Akademio li Viennes Ido-Societo in 1920 fa li iniciative al reorganisation de ti corporation e crea li Ido-congress-moventie. In annu 1921 sub grand impedimentes e contra li resistentie de grand oposition de pessimistic samideanes it arangea li unesim international congress de Ido, in quel prende porte 14 nationes e quel malgré su desfacilitá in li preparation manifesta un grand success comparat al secuentis.

In li secuent annus membres del societé publica diversi prospectes propagatori, jurnales (Libereso, Kombato), brochures in Ido, p.e. “La libro de 100 marveli” de K. Janotta. “Wörterbuch Ido-Deutsch” de K. Janotta. “Voyo al eterna paco” de K. Bresny, “La Glaciala Kosmogonio” de E. K. Pigal. On funda Austriana Ido-Federuro, quam section de Internaciona Uniono por la L. I. Ido.

In annu 1922, pos li aparition de Kosmoglott, pluri membres comensa studiar li nov direction in li L. I., manifestat del autor de Occidental. In comensa li opiniones es contraditori. Ma li interesse por Occidental cresce e deveni general. Pro to li ultim presidente de Ido-Societo Progreso Sr. Baller consenti que Pigal durant li autunal conventes 1924 fa un curs pri li tema “Espo, Ido e Occidental“, quel dural tri mensus e persuade li membres ancor sceptic. Li referent tracta li historie del modern L. I., li logica in li lingue e in Ido, li centes de synonymes in Ido (li formes international radica e li derivation idologic e innatural), li plurale aditiv, li derivation denominal de verbes regulat in Occidental e li “renversebleso” de Ido, substantivation de verbes in li international paroles del lingues natural e in Ido, li suffixes, ortografic principies, li erras filologic in li radicarium de Ido etc., li international symboles del chemic elementes in Ido e in Occidental etc.

Li occidentalistic membres de Ido-Societo Progreso Wien declara maner idistes in li sense del devises idistic:

“Progress es vive, stagnation es morte!”
“Sempre pret, nequande compleet!”

Jean Baptiste - E. K. Pigal
1924